Menaxhimi i integruar dhe kontrolli i kufirit shtetëror bëhet me qëllim të:

- sigurimit të pacenueshmërisë së kufirit shtetëror;
- mbrojtjes së jetës dhe shëndetit të njerëzve;
- parandalimit dhe zbulimit të veprave penale dhe kundërvajtese, zbulimit dhe arrestimit të kryerësve të tyre;
- parandalimit, zbulimit dhe ndalimit të migrimit të kundërligjshëm;
- ofrimit të sigurisë së njerëzve dhe pronës së tyre si dhe mbrojtjen e ambientit në territorin e Republikës së Kosovës;
- parandalimit, zbulimit dhe hetimit të krimit ndërkufitar në partneritet me agjencitë e tjera shtetërore për zbatimin e ligjit;
- parandalimit dhe zbulimit të të gjitha kërcënimeve tjera për sigurinë dhe rendin publik të lidhura me kufijtë shtetëror;
- parandalimit të lëvizjes së kundërligjshme të mallrave dhe pasurive te tundshme për të siguruar që të hyrat e akcizës doganore dhe tatimet të paguhen në mënyrë të duhur sic parashihet me ligj;
- parandalimit të lëvizjeve të mallrave dhe bagëtive të infektuara përmes kufirit shtetëror.

Organet që kryejnë menaxhimin e integruar dhe kontrollin e kufirit shtetëror

Menaxhimi i integruar dhe kontrolli i kufirit shtetëror është kryesisht kompetencë e Ministrisë së Punëve të Brendshme.
Detyrat e menaxhimit të integruar dhe kontrollit të kufirit shtetëror i kryen kryesisht policia kufitare, e ndihmuar nga agjencitë e tjera shtetërore relevante.

Policia kufitare është përgjegjëse për:

- menaxhimin dhe kontrollin në Pikat e kalimit Kufitar;
- menxahimin, kontrollin dhe mbikëqyrjen përgjatë Kufirit të Gjelbër;
- menxahimin, kontrollin dhe mbikëqyrjen përgjatë Kufirit të Kaltër;
- menxahimin dhe kontrollin brenda Republikës se Kosovës lidhur me çështjet kufitare;
- lëshimin e dokumenteve të përkohshme të udhëtimit siç përcaktohet nga Ministria e Punëve të Brendshme;
- sigurinë në aeroportet ndërkombëtare në bashkëpunim me operatorin e aeroportit dhe autoritetet relevante të autorizuara;
- parandalimin e akteve terroriste në partneritet me të gjitha agjencitë për zbatimin e ligjit;
- përcaktimin e së drejtës së çdo personi që dëshiron të hyjë apo të lëshojë Kosovën lidhur me kërkesat për viza dhe hyrje.
- mbylljen e përkohshme të kufijve, sipas vendimit ministror.
- dhënien e autorizimit të përkohshëm për të kaluar Kufirin e Gjelbër dhe të Kaltër sipas vendimit.