За санитарните мерки постапката вклучува инспекција на увозот при што се проверува документацијата, пакувањето и означувањето во врска со безбедноста на храната, органолептичкото испитување на лице место или земање на мостри за испитување и контрола од овластени лаботатории.

Надлежна за вршење на стручните и управните работи во областа на безбедноста на храната е Агенцијата за храна и ветеринарство на Република Македонија cогласно Законот за безбедност на храната (Службен весник на Република Македонија 157/10).

Храната и производите и материјалите кои доаѓаат во контакт со храна од увоз подлежи на контрола на границата, на места определени за таа намена. Забранет е увоз на храна, производи и материјали кои доаѓаат во контакт со храната од увоз на територијата на Република Македонија, се додека не се заврши контролата на пратката од увоз и не биде издадено одобрение за увоз од страна на инспекторот. Инспекторот може да даде согласност пратката да влезе на територијата на Република Македонија и пред завршувањето на контролата во случаи кога е земена мостра од лабораториското испитување на нејзината безбедност, а истата е складирана во складиште што ги исполнува пропишаните законски услови. При увоз на храна од животинско потекло, задолжително мора да се поседува решение за увоз на производи од животинско потеклo. За да може да се извезе храна од РМ потребно е извозникот да има сертификат за безбедност кој го издава Агенцијата за храна и ветеринарство, со кои се потврдува безбедноста на храната.

При привремен увоз или транзит на храна, потребно е да се поднесе барање за привремен увоз  или барање за транзит од страна на увозникот или вршителот на транзитот.

Забранет е промет (увоз, извоз, реекспорт, транспорт, складирање, дистрибуција и продажба) на небезбедна храна. Како небезбедна храна се смета:

- Храна што е небезбедна за човекова употреба, со изминат рок на употреба и е со оштетено пакување што може штетно да влијае врз квалитетот на храната.
- Храна што е произведена или продадена со отстапување од барањето за хиена на храна и не е во согласност со правилата на добрата произвоствена, хигиенска и земјоделска пракса.
- Храна што ги доведува во заблуда потрошувачите.

- Храна што содржи патогени микроорганизми или патогени паразити, односно нивни развојни форми и секрети или штетници што можат штетно да влијаат врз здравјето на луѓето;
- Храна што содржи остатоци од пестициди и лекови од ветеринарна употреба што не се дозволени или во количества над максимално дозволените нивоа;
- Храна што содржи токсични метали, неметали, други хемиски загадувачи од околината, како и отрови и други материи во концентрација која може штетно да влијае врз здравјето на луѓето;
- Храна што е механички загадена со примеси што можат штетно да влијаат врз здравјето на луѓето или предизвикува гадење;
- Храна што содржи адитиви што не се дозволени за производство или ако содржи недозволени количества адитиви, или ако адитивите се технолошки неправилно применети;
- Храна што е со изменет состав или органолептички својства поради физички, хемиски, микробиолошки или други процеси;
- Храна што содржи радионуклеиди над определената граница или е озрачена над границите определени со прописите;
- Храна што не е означена или ако од означувањето не може да се утврди рокот на траење;
- Храна што нема податоци од декларацијата на пакувањето од кое се продаваат кога се работи за храна што не е во оригинално пакување, односно што се продава во растурена состојба (ринфуза);
- Храна што е од животинско потекло и не е означена со ознаките за безбедност во согласност со прописите за ветеринарно здравство;
- Храна што на било кој начин претставува ризик за здравјето на човекот и
- Растителна храна и производи од растителна храна врз чии семенски материјали е генетски интервенирано.

Храната што се произведува и се пушта во промет мора да биде во согласност со барањата утврдени со Македонскиот кодекс за храна. Македонскиот кодекс за храна го сочинуваат сите прописи за храната што се произведува и се става во промет во Република Македонија.

Производителот, односно трговецот на храна се должни храната што е наменета за ставање во промет да ја означат со следниве податоци:

1. Име на производот под кое се продава;
2. Географско потекло на производот;
3. Име на производителот или трговецот на храната на начин кој овозможува негово лесно препознавање;
4. Нето-тежина или волумен на храната;
5. Суровините и адитивите користени за подготовка на храната, според количината, по опаѓачки редослед;
6. Рокот на траење на храната (има трајност до...) или во случај на микробиолошки лесно расипливи производи датумот до кој храната е безбедна за употреба (мора да се употреби до...)
7. Специфичните услови за складирање неопходни за одржување на безбедноста на храната, препораки за условите за употреба доколку тие значително влијаат на рокот на употреба на храната, односно на рокот до кој храната задолжително треба да се употреби;

8. Нутритивниот состав во случај кога храната е наменета за посебна нутритивна употреба и
9. Бројот на одобрението за храна произведена со иновирани технологии и храна за посебна нутритивна употреба.

Информирање за постоење директен или индиректен ризик по здравјето за луѓето кој произлегува од храната врши Дирекцијата за храна преку Системот за рано предупредување (РАСФФ). Во случај кога Агенцијата за храна и ветеринарство е известена преку РАСФФ од Европската унија, дека одредена храна е небезбедна, Агенцијата за храна веднаш презема мерки за ограничување на пуштање во промет, повлекување од промет и забрана за увоз на небезбедна храна.